ISilo uMisuzulu kaZwelithini sesiphinde saqoka uMfundisi Thulasizwe Buthelezi, ukuba abe nguNdunankulu kaZulu.
UButhelezi ufungiswe ngokusemthethweni oPhongolo, Imbube Lodge ehhovisi lobuKhosi bakhe INkosi, ngoLwesibili lwangomhlaka-2 December 2025.
OLUNYE UDABA: UNgqongqoshe uButhelezi uhlinzeka ngosizo lwesikhashana wahlola umthelela wezinhlekelele kuMasipala wendawo yaseMshwathi
UButhelezi akaqali ukuba kulesi sikhundla njengoba ngonyaka ka-2024 akewasibamba wabe esehla kuso ekuqaleni kwalo nyaka.
Isifungo siqhutshwe nguMfundisi wasebukhosini, uCanon H. Mbatha, phambi kwamalungu omndeni wasebuKhosini bakwaZulu, iNdlovukazi yakhe uSihle Mdhluli kaMawewe, amalungu omndeni wasebuKhosini baseSwatini, uShansela wasebuKhosini woMbuso wakwaZulu, AmaKhosi, nezikhulu eziphezulu zeHhovisi Lobukhosi bakhe INkosi.
INgonyama iveze ukumethemba okugcwele ebuholini uMfundisi uButhelezi kanye nekhono lakhe lokuqhuba uhlelo lwamasiko nentuthuko yoMbuso phambili ngenhlonipho nokuzithiba.
