Kushone umuntu oyedwa engozini eyenzeke eduze naKwaMashu, enyakatho yeTheku ngoLwesine.
Kushayisane iloli nebhasi ku-M25.
Okhulumela abosizo lokuqala i-ALS uGarrith Jamieson, uthi abezimo eziphuthumayo balaphe abantu abaningana endaweni yesigameko.
“Kusolwa ukuthi iloli belingalawuleki laphuma kumzila walo layoshayisana nebhasi.
“Abosizo lokuqala bathole inqwaba yabantu ilimele kwabe sekujutshwa amanye ama-ambulensi kanye nezinye izimo eziphuthumayo endaweni yesigameko ukuzolekelela. Kutholakale ukuthi kulimale abantu abangu-35.
Ngeshwa, umshayeli eloli okukholakala ukuthi iminyaka yakhe iko-50 ubudala utholwe ebambekile ngaphakathi elolini elimele kanzima.”
OLUNYE UDABA: Kuvulwe icala lokubulala ngokungenhloso kulandela ingozi yebhasi yasoThongathi
Khonamanjalo, kwenye ingozi kushone umuntu oshayiswe yimoto eMgungundlovu.
UJamieson uthi isigameko senzeke eduzane naku-Otto’s Bluff Road.
“Kukholakala ukuthi kushayisane imoto netekisi ezimpambanweni zomgwaqo. Kubikwa ukuthi belingalawuleki laphaphalaza laphuma emgaqweni layoshayisa umuntu obehamba ngezinyawo. Abosizo lokuqala bahlole indoda okukholakala ukuthi ineminyaka ebalelwa ko-40 ubudala.
“Ngeshwa ulimale kabi kakhulu, wahlonzwa njengoshonile njengoba abosizo lokuqala bekungekho abebesangakwenza. Umshayeli wemoto encane yena uphuthunyiswe esibhedlela ngenxa yokulimala.”
IZITHOMBE:
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
