INkantolo Ephakeme yaseNyakatho Gauteng ePitoli igodle isinqumo mayelana nokushicilelwa kwemiphumela yokuhlolwa kweNational Senior Certificate (NSC) nguMnyango Wezemfundo Eyisisekelo (DBE) ngemuva kokulalelwa kwecala izinsuku ezimbili ngalolu daba.
Kusukela ngomhlaka-27 kuya kumhlaka-28 October 2025, i-Information Regulator (IR) kanye noMnyango Wezemfundo Eyisisekelo (DBE) babuyele eNkantolo Ephakeme ngecala labo.
Lokhu kuza ngemuva kokuchithwa kwesicelo esiphuthumayo esafakwa yi-IR eNkantolo Ephakeme ngomhlaka-09 January 2025.
I-IR ifake isicelo esiphuthumayo sokuvimbela ukukhishwa kwemiphumela yokuhlolwa (kwe-NSC ) kwamatikuletsheni kumaphephandaba, ikhuluma ngokukhathazeka mayelana nokwephulwa kobumfihlo babafundi ngaphansi koMthetho Wokuvikelwa Kolwazi Lomuntu Siqu (Protection of Personal Information Act – POPIA).
OLUNYE UDABA: Owezemfundo eKZN unxusa abafundi ukuba bawasebenzise ngendlela efanele amaholidi ezikole
Yize kunjalo, i-DBE iphikise isicelo, kanti-ke i-AfriForum ijoyina leli cala njengeqembu elinentshisekelo.
I-Economic Freedom Fighters yona yesekela i-IR kwinselela yenkantolo, ibalula ukukhathazeka ngokushicilelwa kwemiphumela yokuhlolwa.
I-IR iphikise ngokuthi imiphumela akufanele ishicilelwe, noma ngabe awabhaliwe amagama abafundi
Ngemuva kwezinsuku ezimbili zezimpikiswano ezivela kubameleli bezomthetho be-IR kanye ne-DBE, amajaji eNkantolo Ephakeme azocubungula izethulo ezenziwe ngaphambi kokukhipha isinqumo.
Ikilasi likamatikuletsheni lika-2025 njengamanje libhala izivivinyo zalo ze-NSC, kanti ukumakwa kulindeleke ukuthi kuqale ekuqaleni kukaDecember.
Imiphumela kamatikuletsheni kulindeleke ukuthi ikhishwe ekuqaleni konyaka ka-2026.
