UNgqongqoshe Wezobudlelwano Namazwe oMhlaba uRonald Lamola uthi angu-42 amazwe nezinhloko zezinhlangano zamazwe ngamazwe azoba yingxenye yeNgqungquthela Yabaholi be-G20 eGoli kuleli sonto.
“Lokhu kubala amalungu angamashumi amabili e-G20, ngaphandle kwe-United States ngezizathu ezaziwayo, amazwe angu-16 azotheleka kanye namazwe angu-6 amele iMiphakathi Yezomnotho Yesifunda e-Afrika, eCaribbean naseMpumalanga ye-Asia,” esho.
Ekhuluma ngamalungiselelo ezwe omhlangano, uLamola uthe iNingizimu Afrika isikulungele ukusingatha umhlangano, ozobanjelwa kuleli zwekazi okokuqala ngqa.
Ungqongqoshe ubambe isithangami nabezindaba ngoMsombuluko eNasrec, nokuyindawo yengqungquthela.
OLUNYE UDABA: Abalimi besiFunda iLembe bazozuza lukhulu engqungqutheleni yezoLimo
ULamola uthi ingqungquthela izogxila ezingxoxweni ezintathu ezisemqoka. Abaholi bomhlaba wonke bazobhekana nezinkinga eziphathelene nokukhula komnotho, ukuqina komhlaba wonke, kanye nekusasa elifanelekile lawo wonke umuntu.
Lezi zingxoxo zizophinde zihlanganise ezohwebo, ukuthuthukiswa kwezezimali, ukuguquka kwesimo sezulu, ukuguquka kwamandla, izimbiwa ezibalulekile, umsebenzi omuhle nohlelekile, kanye ne-AI Artificial Intelligence.
Khonamanjalo, uNgqongqoshe uLamola uveze ukuthi basola umkhankaso wokususa abantu basePalestine eGaza, ngokugasela kwebhanoyi elahlala kuleli, lithwele abantu ababalelwa ku-150 basePalestine.
Leli bhanoyi lihlale esikhumulweni sezindiza e-OR Tambo, eGoli ngeledlule.
ULamola uthe abasafuni kube namanye amabhanoyi azoza kuleli ethwele abantu basePalestine.
“Sikhathazekile ngokwenzekile, yingakho sekunophenyo mayelana nakho. Asifuni kube nabanye abasePalestine abazotheleka ngamabhanoyi beze kuleli.”
