INkantolo eNkulu eThekwini igwebe uSiyabonga Ngubane udilikajele noSithembiso Khomo iminyaka engu-20 ngokubulala uSmanga Vusimuzi Khumalo ngoMarch 2025 eMlazi, esigcemeni sakwa-Q.
UNgubane olahlwe nangamacala elokuphatha isibhamu ngokungemthetho ezinhlamvu, wengezelwe iminyaka engu-18.
Ngaphambi kwesigameko, laba balisa bahlela ukubulala uKhumalo owayehamba ngesihlalo ngenxa yokuthi wayekade elimale kwesinye isigameko sokuhlaselwa. Laba balisa bahloma ngesibhamu, ngomhlaka-28 March 2024 uKhomo wahambisa uNgubane ngemoto eMlazi.
UNgubane wafika wadubula uKhumalo wambulala. UKhomo wathatha uNgubane ngemoto endaweni yesigameko babaleka. UKhumalo washonela endaweni yesigameko ngenxa yamanxeba okudutshulwa ekhanda.
Umphakathi waqoqana wahubha uNgubane noKhomo wabikela namaphoyisa ngesigameko ukuthi alekelele nokwaholela ekuboshweni kwabamangalelwa.
UMshushisi woMbuso u-Advocate Bonginkosi Mbokazi ubize ufakazi ochaze ngobufakazi besibhamu wabiza nomunye ochaze ngobufakazi bamaselula obukhomba abamangalelwa endaweni yesigameko. Amaphoyisa afika endaweni yesigamkeo nawo abiziwe afakaza.
OLUNYE UDABA: Ugixabezwe ngodilikajele ababili owadlwengula wabulala ingane ehlathini
U-Adv. Mbokazi uphinde wethula isitatimende sikamama kaKhumalo asibhale eluswe wuThandeka Nadi Mofokeng oyi-Court Preparation Officer. Esitatimendeni sakhe umama kamufi uthe indodana yakhe ibiyondla ekhaya futhi bonke bebethembele kuyena. Uchaze ngesigameko sokuqala sokuphangwa kukaKhumalo. Uthe kulesi sigameko umufi walimala kakhulu emgogodleni wagcina ehamba ngesihlalo. Uthe abamangalelwa laba abagwetshiwe badale umonakalo ongeke usalungiseka emdenini.
UNgubane ugwetshwe udilikajele ngecala lokubulala, iminyaka ewu-15 ngecala lokuphatha isibhamu ngokungemthetho neminyaka emithathu ngokuphatha izinhlamvu ngokungemthetho. Inkantolo ithe izigwebo uzozidonsa kanyekanye nokuchaza ukuthi uzodonsa udilikajele. Inkantolo ngesikhathi igweba uKhomo ichezukile kulesi sigwebo sikadilikajele esibekiwe yamgweba iminyaka ewu-20. Inkantolo ithe uKhomo wabamba iqhaza kulesi sigameko azi kahle konke ayekwenza kodwa iqhaza lakhe laba lincane uma kuqhathaniswa noNgubane.
Ngaphezu kwezigwebo inkantolo ithe abafanelwe wukuba nemvume yokuphatha izibhamu.
I-NPA iyasithokozela isigwebo. Sigcizelela isifungo sethu sokugcina umthetho silwelele ubulungiswa ngaphandle kokwenzelela. Sizimisele ukuvikela isithunzi namalungelo abantu futhi sinethemba lokuthi lesi sigwebo sizoduduza umndeni.
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
