Inyunyana yamaphoyisa, i-POPCRU, isiphakamise ukuba kuthathwe izinyathelo ngokushesha ukuze kuqiniswe ezokuphepha eziteshini zamaphoyisa ophiko lwe-SAPS, KwaZulu-Natal.
Lokhu kungemva kokuba indoda esolwa ngokuzama ukubamba isibhamu sephoyisa esiteshini samaphoyisa esisenyakatho ye-KZN, ngaphambi kokuhosha isibhamu sayo kanye nokusabisa abasebenzi.
Amaphoyisa asesiteshini saseSikhaleni aphoqeleke ukuba asukumele lokhu ngesonto eledlule.
OLUNYE UDABA: Kushone osolwa ngokuduna iQuantum edubulana namaphoyisa eKZN
Amaphoyisa aveze ukuthi ngoLwesine kungene indoda eCommunity Service Centre. Le ndoda yathi idinga usizo, kodwa yabe isizama ukubamba isibhamu sephoyisa.
Esitatimendeni esithunyelwe abezindaba, amaphoyisa athi ngesikhathi ihluleka, ikhiphe isibhamu sayo yakhomba iphoyisa ngaso.
Elinye iphoyisa libe selivulela ngenhlamvu kwashona ushayasibhamu.
Inyunyana iPolice and Prisons Civil Rights Union ithi lokhu kuhlasela kugqamisa ubungozi bansuku zonke obubhekene namaphoyisa.
Inyunyana isiphinde yanxusa uMnyango wamaphoyisa wophiko lwe-SAPS kanye noMnyango WezamaPhoyisa ukuba babhekane ngokushesha nezikhalo osekunesikhathi eside, okubalwa ezokuphepha esiteshini, ukushoda kwabasebenzi kanye nokushoda kwezinsiza.
