Iziphathimandla zezokuthutha KwaZulu-Natal zisiqaphile isimo njengoba izinga lezimoto emgaqweni yesifundazwe liqala ukwanda ngaphambi kosuku olandulela unyaka omusha.
Iziphathimandla zikhiphe isixwayiso esiqinile kubashayeli bezimoto ukuthi bahloniphe imithetho yomgwaqo kulesi sikhathi, noma bayochitha unyaka omusha ejele.
Iziphathimandla zithi ukuphuza utshwala nokushayela ngesivinini esikhulu kusalokhu kuyinto ehamba phambili njengoba belungiselela isonto elimatasa emigaqweni.
OLUNYE UDABA: Osolwa ngokubulala uDJ Warras uzowudlela esitokisini uNcibijane
Imigwaqo yaKwaZulu-Natal iqala ukuba matasa njengoba isifundazwe silungiselela imigubho yoNyaka Omusha. Izimoto ziqale ukwanda ekuseni ku-N3 namuhla, njengoba kuqoshwe isibalo sezimoto ezingaphezu kwezingu-1000 ngehora zingena, ziphuma eThekwini eMarianhill Toll Plaza, emini.
Okhulumela abakwa-Road Traffic Inspectorate (RTI), uSindi Msimang, uthi bazobhekana nalabo ababonisa ukungawunaki ngokuphelele umthetho womgwaqo.
UMsimang unxuse abashayeli ikakhulukazi abesilisa ukuba bayihloniphe imithetho yemigwaqo kanti osephuze utshwala uyacelwa ukuba ahlale ekhaya bangashayeli ngoba lokho kudala izinkinga emgaqweni.
Uthi kubakukhulu ukuphuza utshwala ngobusuku obandulela unyaka omusha nangosuku lokuqala onyakeni njengoba abantu basuke besajabule.
UMsimang uthi bazobonakala kakhulu emgaqweni bena imisebenzi yezokuphepha emgaqweni ehlanganisa izinhlangano eziningi ukuze baqinisekise ukuthi umthetho uyalandelwa.
