I-Inkatha Freedom Party inxuse amaphoyisa ophiko lwe-South African Police Service ukuba aphenye ngokushesha izinsongo zokubulala ezibhekiswe kuNdunankulu waKwaZulu-Natal, uThamsanqa Ntuli.
I-IFP ithi izinsongo, ezibhekiswe kuNdunankulu, zivele ezinkundleni zokuxhumana.
USotswebhu Omkhulu we-IFP esiShayamthetho saseKZN, uBlessed Gwala, uthe okungenza uNdunankulu abe yisisulu kungaba yizenzo zakhe ezimelene nenkohlakalo kanye nokuphathwa kabi.
UGwala unxuse umbuso ukuba uhlinzeke uNtuli ngezokuphepha ezisezingeni eliphezulu.
“Masicacise, izinsongo zalolu hlobo akuzona izitatimende zezepolitiki noma ukuzwakalisa imibono. Ziyizenzo zobugebengu.
OLUNYE UDABA: Uyavela enkanyolo oboshelwe izinsolo zokusabisa uRamaphosa
“Lezi zinsongo zibeka impilo kaNdunankulu engozini futhi zilulaza umthetho. I-IFP isivule icala emaphoyiseni ophiko lwe-SAPS ukuze abhekane nalolu daba.”
UGwala uthe labo abanecala kumele baphendule ngezenzo zabo, okubalwa nokudalula ukuthi ngubani owayala noma osekela izinsongo.
“Kumele kube nemiphumela eqinile.” Ngakho-ke i-IFP ikhipha isixwayiso esicacile kubo bonke abacabanga ukuthi bangenza izinsongo zokubulala ngaphandle kokujeziswa: nizolandelwa, nidalulwe, niphinde nichaze. UNdunankulu ngeke esatshiswe, futhi udlame lwezepolitiki ngeke luvunyelwe ukuba luqale KwaZulu-Natal.”
