Umndeni kaMengameli waseZambia ongasekho emhlabeni, u-Edgar Lungu, umemezele ngoLwesihlanu ukuthi uzofihlelwa ezweni laseNingizimu Afrika kulandela ukungaboni ngaso linye nohulumeni waseZambia ngezinhlelo zawo zomngcwabo kahulumeni.
NgoLwesithathu umndeni kaLungu umise isidumbu sakhe ukuba sibuyiselwe ezweni lakubo sisuka eNingizimu Afrika, nokuyilapho ashonela khona esibhedlela ngomhlaka-5 June, kulandela ukuvela kokuthi uMengameli uHakainde Hichilema ubehlele ukuba kube nguye owamukela umzimba wakhe uma efika, okuyinto emelene nezifiso zomholi ongasekho emhlabeni.
Eziphendulela, u-Hichilema unqamule isikhathi esengeziwe sokuzilela uLungu kuzwelonke.
OLUNYE UDABA: Kuzofihlwa elinye iphoyisa ngoMgqibelo
UHichilema wangena esikhundleni sikaLungu ngo-2021 ngemuva kokuwina ukhetho.
Umngcwabo nokungcwatshwa kukaLungu “kuzokwenzeka lapha eNingizimu Afrika, ngokuhambisana nezifiso zomndeni zokumfihla wodwana,” kusho okhulumela uMnyango uMakebi Zulu esitatimendeni.
“Umndeni wakwaLungu usaqhubeka nokufuna ukuthula nobumbano kuzakhamuzi zaseZambia ngalesi sikhathi,” kusho isitatimende, esiqhube ngokubonga uhulumeni waseNingizimu Afrika “ngokungagxambukeli nokuhlonipha umndeni namalungelo awo umndeni”.
Imbangela yokushona kowayengumengameli eneminyaka engu-68 ubudala ibingakamenyezelwa kodwa ubethola ukwelashwa okuyikhethelo emtholampilo osePitoli, kusho iqembu lakhe iPatriotic Front.
Landela kwi – WhatsApp Channel yethu Izwi Lomzansi 98.0fm
