Ashonile amadoda amabili abebeqeqeshwa eMnyangweni Wamaphoyisa kaMasipala waseGoli (JMPD) ngesikhathi ezilolongela unhlelo lokuba baqasheke ezinsukwini ezahlukene.
Okhulumela i-JMPD uXolani Fihla uthi uMichael Nyambi, oneminyaka engu-24 ubudala ushone ngomhlaka-29 ku-August ngemuva kokuxinwa wukushisa ngesikhathi ebambe iqhaza ohlelweni lokuvivinywa.
UZwelethu Tekete oneminyaka engu-26 ubudala ushone ngoMsombuluko, wangomhlaka-1 September.
OLUNYE UDABA: Sekutholwe ingxenye yengemuva ye-VW Polo yamaphoyisa emfuleni iHennops
UFihla uyachaza, “UMarvellous Michael Nyambi waseRabie Ridge, ubeyingxenye yohlelo lwezivivinyo ukuze aqasheke emaphoyiseni ngoLwesine, lwangomhlaka-28 August, enkundleni yezemidlalo iRuimsig, ngesikhathi eguliswa ukushisa.
“Uxilongwe ngabosizo lokuqala endaweni yesigameko wabe esephuthunyusiwa esibhedlela iYusuf Dadoo ukuze eyothola okunye ukwelashwa. Ngeshwa, uNyambi udlule emhlabeni ngoLwesihlanu lwangomhlaka-29 August.
“UZwelethu Tekete, waseBraamfischerville Phase 1, naye ubeyingxenye yalolu hlelo. NgoMsombuluko, ngomhlaka-1 September, ngesikhathi kuqhubeka uhlelo lokuqashwa enkundleni yezemidlalo, ulethwe enkundleni engasanyakazi. Amaphoyisa osizo lokuqala abesendaweni avele aqala i-CPR, kodwa ngeshwa, imizamo yabo ayizange iphumelele,” UTekete uhlonzwe njengoshonile endaweni yesigameko, kuqhuba uFihla.
