Kulandela izingxoxo ezibekhona phakathi kwahulumeni wesifundazwe sakwaZulu-Natal oholwa nguNdunankulu wesifundazwe uThamsanqa Ntuli, uMnyango wezeZimali Kazwelonke usubeke imali elinganiselwe kwengu-R2.2 billion ukuze kukhokhelwe amakhasimende imali yawo ayibeke ebhange Ithala SOC Limited.
Ngemuva kokubonisana noHulumeni Wobumbano Wesifundazwe SakwaZulu-Natal oholwa nguNdunankulu oHloniphekile uThamsanqa Ntuli, uMgcinimafa Kazwelonke uzokhipha imali efinyelela ku-R2.2 billion ukuze kuvunyelwe ukukhokhelwa kwabadibeli be-Ithala SOC Limited (“Ithala”).
Inqubo yokukhokha izoqala ngomhlaka-8 December 2025 kanti ke ababeke imali yabo kumele kuqale kuqinisekiswe imininingwane yabo ukuze inkokhelo iye kubantu abafanele.
Uma seziqinisekisiwe, izimali okufanele bakhokhelwe zona zizothatha cishe izinsuku ezimbili ngaphambi kokuba zingene kwi-akhawunti abazobe beyinikezile.
I-First National Bank iqokwe njengebhange elizokhokhela abantu ababeke imali yabo e-Ithala futhi izokwenza kube lula ukufinyelela ezimalini zabo.
OLUNYE UDABA: “Abafaka izimali zabo e-Ithala Bank sebezokwazi ukuzithola”
Lolu hlelo kuhloswe ngalo ukuqinisekisa ukuthi izimali zikhokhwa ngendlela ehlelekile nephephile.
Ababeke imali yabo ebhange Ithala akubaphoqi ukuba babe ngamakhasimende e-FNB futhi bangakhetha ukudlulisela izimali zabo emabhange abawathandayo okanye abawasebenzisayo.
Sicela uqaphele ukuthi akukho zinkokhelo ezizokwenziwa emagatsheni ase-Ithala.
Abafaki bezimali eBhange lase-Ithala bazothintwa yi-FNB, kuzomele kuxhunywane nabo ngaphambi kokuvakashela igatsha ukuze kuqinisekiswe. Abafaki bezimali bazothintwa nge-SMS enemininingwane yamaphepha adingekayo, okubalwa kuwo:
1. Umazisi
2. Ubufakazi bekheli
3. Ubufakazi be-akhawunti yasebhange ehlukile lapho imali yabo izongena khona.
Kusukela ngoMsombuluko womhlaka-8 December 2025, abafaki bezimali bazokwazi ukuvakashela noma yiliphi igatsha lase-FNB eliseduze nabo.
Abafaki bezimali bazoba nesikhathi kuze kube ngunyaka ka-2028 sokufaka isicelo senkokhelo yabo.
Labo abakweleta ibhange Ithala bayacelwa ukuba baqhubeke nokukhokha izikweletu zabo besebenzisa ibhange i-akhawunti yebhange lakwa-Absa, inombolo ye-akhawunti: 406-776-2302
UMnyango wezeZimali Kazwelonke usebenzisana noHulumeni wesiFundazwe sakwaZulu-Natal ngaphansi kobuholi bomphathi kaNdunankulu uNtuli kanye ne-Prudential Authority ukuqinisekisa inqubo efanelekile nephephile.
