Amaphoyisa aseLimpopo asethole ukuthi abasolwa ababili ababoshwe bathweswa icala lokutholakala nemoto yohlobo lweToyota Hilux bayizingane okumele zithweswe amacala ngaphansi komthetho iChild Justice Act.
Ngolwesibili abezindaba i-IOL babike ukuthi okhulumela amaphoyisa esifundazwe uBrigadier Hlulani Mashaba uthe lezi zingane ezisestokisini samaphoyisa zineminyaka engu-19 nengu-20 ubudala. Kephe ke ngoLwesithathu ebusuku uMashaba utshele abezindaba ukuthi kulandela ukushicilelwa kodaba, abazali balezi zingane zamantombazane bafike esiteshini bephethe izitifiketi eziveza ukuthi aneminyaka engu-15 nengu-16 ubudala.
“Ngalokho bekumele bathweswe amacala ngaphansi kweChild Justice Act kanti manje sebezogcinwa endaweni ephephile njengoba besagqunywe esitokisini samaphoyisa.”
OLUNYE UDABA: Isendaweni ephephile ingane, 4, eyabhaxelwa “ukweba uR1500” kubo
UMashaba uthe usuku lokubuyela enkantolo kwala mantombazane luzomenyezelwa kungekudala.
“Ngisalinde usuku lokuba bavele enkantolo.”
Abezindaba i-IOL bawagodlile amagama nezithombe zala mantombazane ngenhloso yokuwavikela
Ngesonto eledlule, abezindaba babika ukuthi okhulumela amaphoyisa esifundazwe uBrigadier Hlulani Mashaba wathi imoto bekuhloswe ukuthi iwele umncele iBeitbridge iyongena eZimbabwe ngomhlaka-18 May 2025.
Emkhankasweni wokulwa nokushushumbiswa obandakanya ithimba le-SAPS Anti-Smuggling Team, Tshimollo Security and Investigation, neReflex Anti-Hijacking Security, la maphoyisa avimbe imoto yohlobo lweToyota Hilux GD-6 double cab ku-R101 ngasePolokwane weighbridge,” kusho uMashaba kulandela ukuboshwa kwalaba ababili.
“Ngesikhathi imiswa kubaleke umsolwa oyedwa wesilisa wangena ehlathini eliseduze, kwathi abasolwa ababili besifazane bona babanjwa besazama ukubaleka ngezinyawo,” kusho uMashaba.
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
