Ithimba, iPolitical Killings Task Team (PKTT) KwaZulu-Natal libophe umsolwa oneminyaka engu-27 ubudala mayelana nokuzama ukubulala uNobhala wesiFunda we-MK Party Ilembe, uZanele Mbhamali, nomyeni wakhe.
Umsolwa, uVelile Ntshangase, waseMahlabathini, uvele phambi kweNkantolo yesiFunda saseNdwedwe ngomhlaka-27 July 2026 ngamacala amabili okuzama ukubulala.
Icala lihlehliselwe umhlaka-03 August 2026 ukuze umsolwa athole ummeli.
OLUNYE UDABA: UMchunu utshele iKhomishana kaMadlanga ukuthi i-PKTT yase isifike ekupheleni kwesikhathi sayo
Ukuboshwa kwakhe kuza ngemuva kwesigameko esenzeka ngomhlaka-23 June 2026, cishe ngezithuba zabo-22:30. Kusolwa ukuthi uZanele Mbhamali nomyeni wakhe babehamba belibangise ekhaya behamba ngomgwaqo u-P100 bebheke eNdwedwe nokuyilapho abasolwa abangaziwa bokhela ngomlilo imoto yabo.
Amalungu e-KZN Political Killings Task Team athole idokodo ngomhlaka-10 July 2026 abe eseqala ngokushesha uphenyo, olwaholela ekuboshweni kukaNtshangase.
Uphenyo olwengeziwe luveze ukuthi umsolwa wesibili obandakanyeka kuleli cala wadutshulwa wabulawa oshayasibhamu abangaziwa ekhaya lakhe ngomhlaka-29 June 2026 ngemuva kokufika ekhaya ephuma emsebenzini.
-Nosiphokuhle Gumede, Izwi Lomzansi FM
