Umholi weNational Coloured Congress (NCC) ophinde abe yiLungu lePhalamende, uFadiel Adams, kulindeleke ukuthi avele enkantolo yaKwaZulu-Natal ngoLwesine, lwangomhlaka-7 May 2026.
Okhulumela amaphoyisa kazwelonke, uBrigadier Athlenda Mathe, ukuqinisekisile ukuvela kuka-Adams enkantolo.
U-Adams uboshwe lwangomhlaka-5 May 2026, eKapa, ngemuva kokuba i-Political Killings Task Team (PKTT) ifuna ukuthi azinikele esiteshini samaphoyisa esiseduze naye.
Ukuboshwa kwakhe kuhlobene necala lokukhwabanisa nokuphazamisa inqubo yobulungiswa.
OLUNYE UDABA: Kuboshwe iLungu lePhalamende uFadiel Adams
I-SAPS yayinencwadi egunyaza ukuboshwa kwakhe kuphathelene nezinsolo zokuthi waphazamisa uphenyo oluqhubekayo ngokubulawa koMholi we-ANC Youth League ongasekho, uSindiso Magaqa.
Amaphoyisa athi ngophenyo, ithimba le-PKTT lithole ukuthi waphazamisa umbulali olahlwe yicala futhi ogwetshiwe njengamanje esigabeni esibucayi nesiphezulu sophenyo lwamaphoyisa.
UMagaqa wadutshulwa ngoJuly 13, 2017.
Amakhansela amabili, uJabulile Msiya noNonsikelelo Mafa, ababenoMagaqa ngesikhathi sokuhlaselwa endaweni yokuwasha izimoto, nawo adutshulwa kodwa asinda.
