Owayengumengameli kuleli uJacob Zuma uthe ukholelwa ukuthi manje “unamandla” kanye nogqozi lokuwina ukhetho oluzayo lohulumeni basekhaya ngemuva kokuvakashela ithempeli lamaHindu eNdiya kanye no-Ajay Gupta osolwa ngenkohlakalo.
Imibiko iphakamisa ukuthi lolu hambo lwaseNdiya beluwuhambo lwangasese, kanti iqembu likaZuma, uMkhonto weSizwe Party, linqabile ukuphawula ngalo.
Kwi-video esabalele ezinkundleni zokuxhumana, uZuma utshele izintatheli eHaridwar, iDolobha lasendulo esifundazweni esisenyakatho ye-Uttarakhand, ukuthi uze eNdiya ukuzohlangana “nomngani” ophinde abe “ngumfowabo” u-Ajay.
OLUNYE UDABA: Ubuyela enkantolo uJacob Zuma
Uthe u-Ajay umtshele “ngomuntu kaNkulunkulu” abefuna ukumethula kuye.
“Nginomuzwa wokuthi ngizowina ukhetho ngoba abantu bakaNkulunkulu bebe nami… Ngakho-ke ngiyajabula ukuthi ngikuleli lizwe, lapho umfundisi womoya wamaHindu engitshengisile ukuthi kwenzekani. Ngicabanga ukuthi ube nami ezindaweni ezinzima kakhulu.
“Ngicabanga ukuthi unginike amandla athile, akanginikanga amandla nje kuphela, kodwa unginike ugqozi lokuthi ngiphinde ngiyise abantu bethu lapho kufanele babe khona, futhi ngijabule kakhulu,” esho.
UZuma utshele abezindaba eNdiya ukuthi iziphathimandla zaseNingizimu Afrika zilandele umndeni wakwaGupta ngoba “bebengawuthandi umsebenzi” ababewenza naye.
Idolobha lasePitoli lenze imizamo eminingana yokubuyisela izelamani zakwaGupta eNingizimu Afrika ukuze zibhekane namacala ahlobene nokubanjwa kombuso (state capture). Ngokusho kwemibiko, izelamani zakwaGupta njengamanje sezihlale e-United Arab Emirates (UAE), kodwa futhi ziyakwazi ukufinyelela ezweni lazo ezizalwa kulo eNdiya.
I-video:
President Jacob Zuma was pleased to reunite with Ajay Gupta in India, describing him as a brother & friend. Zuma said some people in South Africa never approved of their friendship. Gupta introduced Zuma to a Man of God & hopes the encounter will help him win the next election. pic.twitter.com/VsrlEwR7D9
— Man’s NOT Barry Roux (@AdvoBarryRoux) July 1, 2026
