Abashayeli bamaloli bahlela ukuvala imigwaqo emikhulu ngenxa yokuqashwa kwabantu bakwamanye amazwe nemithethonqubo yezimboni.
Abashayeli bamaloli bathi izikhalo zabo zihlanganisa ukuqashwa kwabantu bangaphandle abangenazo izincwadi ezibagunyaza ukuba kuleli, izinkinga zomthetho wezabasebenzi kanye nomthelela wezokuphepha kwabo emgaqweni.
OLUNYE UDABA: Usoseshini uthi sisazoqhubeka isiteleka samatekisi eClermont naKwaDabeka
Abashayeli bamaloli balungiselela isiteleka esizoba emizileni eminingi kazwelonke ngoMgqibelo womhlaka-30 May 2026, okuhlanganisa u-N2 no-N3 KwaZulu-Natal.
Inhlangano, i-All-Truck Drivers Forum kanye ne-Allied South Africa (ATDF) ithi abasebenzi bakhathazekile ngokuqashwa kwabantu bangaphandle abangenazo izincwadi zokuba kuleli, ukuphoqelelwa kwemithetho yabasebenzi kanye nokufuduka nokulawulwa kwezinkampani zamaloli.
UMnyango wezokuThutha KwaZulu Natal ngoLwesine, uthe baxoxisana nohulumeni kazwelonke ngesenzo sokuteleka esihleliwe.
UNdabezinhle Sibiya, okhulumela owezokuthutha eKZN, uthe bakhathazekile ngezingozi zomgwaqo eziqhubekayo ezibandakanya abashayeli bamaloli bakwamanye amazwe abangenazo izincwadi zokuba kuleli kanye nemikhuba yabasebenzi embonini yamaloli.
“Sike sasho esikhathini esedlule ukuthi abanikazi bezinkampani eziqashe abantu bakwamanye amazwe ngokungemthetho ukushayela emigwaqweni yethu kufanele baboshwe. Sisebenza ngokubambisana namaphoyisa ophiko lwe-SAPS ngaphansi kobuholi bukaLieutenant General Nhlanhla Mkhwanazi,” kusho uSibiya.
