I-National Prosecuting Authority (NPA) , yamukele isigwebo sikadilikajele esitholwe wuMxolisi Bhekani Sthole noFisokuhle Scelo Mhlongo, 31, eNkantolo yesiFunda eShowe ngemuva kokulahlwa yicala lokubulala.
Abamangalelwa bahlambulukile bavuma amacala ngokuka-Section 112 of the Criminal Procedure Act , lokubulala owesifazane oneminyaka engu-77 ubudla waseMelmoth ngoJuly 2025.
La madoda alandise inkantolo ngokuthi bakholwa wukuthi umufi owayewumelaphi wendabuko, wayebamise kabi ebathakatha baze bathatha isinqumo sokumbulala. Ngomhlaka-11 July 2025, phakathi kwamabili bagasela emzini kamufi bafika bamshaya bamklinya bamnquma uqhoqhoqho base beyabaleka.
OLUNYE UDABA: Owesifazane uvulele usbali wakhe icala ngezinsolo zokuthakatha
Ngakusasa amaphoyisa alunywa indlebe nokwaholela ekuboshweni kwabo. UMshushisi uNomthandazo Mkhize ekhonga isigwebo esinzima wethule isitatimende somuntu obesondelene nomufi elisibhale leluswe wu-Amanda Pretty Nxumalo.
Isitatimende siveze umonakalo odalwe yisigameko emndenini nasemphakathini. Umufi uchazwe njengomuntu obemnene ewusizo. Ngaphezu kwesigwebo inkantolo ithe laba bobabili abafanelwe wukuba nemvume yokuphatha isibhamu.
Thina nezinye izinhlaka sizimisele ukuqinisekisa ukuthi abagila imikhuba yobugebengu bayajeza. Ukulwela izisulu zithole ubulungiswa kuseqhulwini.
