Umndeni wowayengungqongqoshe uNkosinathi Emmanuel “Nathi” Mthethwa uthi usalinde uhulumeni ukuthi awunikeze imininingwane ngokishona kwakhe.
UMthethwa, obeyinxusa laseNingizimu Afrika laseFrance, utholwe eshonile ehhotela eliseParis ngoLwesibili.
Ngokusho kwabashushisi baseFrance, ifastela legumbi elisesitezi se-22 abelibhukhile lavulwa ngendluzula kusetshenziswa isikelo.
Okhulumela umndeni wakwaMthethwa, uKhulekani Mthethwa, uthe bebengakakutholi ukuxhumana okusemthethweni okuvela kuhulumeni oaknye ku-ANC ngokudlula emhlabeni kukaNathi Mthethwa.
OLUNYE UDABA:Inkantolo ivimbele i-Alexander Forbes ukuba idedele izimali zikaMabuza
Ekhuluma nabezindaba ze-SABC, umfowabo kaNathi Mthethwa, uKhulekani Mthethwa, uthe ukushona kukaNathi bavele bakuzwa ngemibiko yabezindaba, wazwakalisa nokungenami ngendlela okusingathwe ngayo ukudlula kwakhe.
Ukholwa wukuthi i-ANC bekufanele iwazise umndeni, njengoba lowo owayengungqongqoshe ebesebenzela le nhlangano kusukela esemncane.
Khonamanjalo, iSekela lomxhumanisi we-ANC esifundeni u-Aphiwe Mhlongo ukuqinisekisile ukuthi inhlangano seyihlangene nomndeni ngokomyalelo wobuholi obuphezulu.
“Ngingasho kahle ukuthi sithole ucingo oluvela kumdidiyeli wesifundazwe ethi, ‘Kumele sibe lapha ngokugcwele, okuyinto engiyenzayo. Sijutshwe yi-ANC’.
Unkosikazi kaMthethwa uthe umbone okokugcina ngoMsombuluko ntambama ngesikhathi bekumele aye emcimbini, wabe esethola umyalezo ebusuku “lapho exolise khona futhi eveza nenhloso yakhe yokuthatha impilo yakhe,” kusho umshushisi uLaure Beccuau esitatimendeni.
“Uphenyo lokuqala luveza ukuthi lokhu bekungaba yisenzo samabomu, ngaphandle kokungenelela komuntu wesithathu,” usho kanje, egcizelela ukuthi uphenyo luzofuna ukuqoqa yonke imininingwane.
UMthethwa ubeyinxusa kusukela ngo- 2024.
