19 August 2025
Lungani Mnguni
UMphathiswa Wezezimali esifundazweni saKwaZulu-Natal, uMnu Francois Rodgers, uthi uhulumeni weSifundazwe ususendleleni yokuzinza, futhi angeke usadonswa emuva ngabaqashi bakaHulumeni abenza okungamukelekile ngokusebenzisa imali yomphakathi ngezindlela ezingekho emthethweni.
Ube esechaza ukuthi uhulumeni uqalile izinyathelo eziqinile zokulwa nenkohlakalo nokusetshenziswa kabi kwezimali zomphakathi. Lokhu ukusho ngesikhathi ekhuluma emhlanganweni nababambiqhaza obubanjelwe eElangeni Hotel, obuhlelwe uMnyango Wezokuphepha Komphakathi Nokuxhumana, bekuhambisana noNdunankulu wesifundazwe, uMnu Thami Ntuli.
OLUNYE UDABA: UMkhuzi uLt General Nhlanhla Mkhwanazi Uthi Ukuthengwa Kwemishini Kuzoqinisa Umzabalazo
UMEC Rodgers ukhombisile ukuthi uhulumeni usulindele ukuhlanzeka ezindabeni zezimali. Izinyathelo ezithathiwe zifaka phakathi:
- Ukwethulwa kohlelo lwe-eProcurement oluhlose ukwenza ukuthi ukuthengwa kukahulumeni kube sobala futhi kulawuleke, kuqedwe inkohlakalo nenketho enobandlululo.
- Ukwethulwa kweSikhungo Sokuhlaziya Idatha esizosiza ekubhekeni ukusetshenziswa kwezimali nsuku zonke, kuhlonzwe nezinkinga kusenesikhathi.
- Ukuvalwa kwemikhosi yokugcina unyaka ebizothatha izimali zomphakathi ngaphandle kwesidingo.
- Ukunqamula ukuhamba okungadingekile kwezikhulu zikahulumeni ngendiza nezimoto eziyizintandokazi.
