I-ActionSA isikugxekile ukuziphatha kwekhansela le-ANC eRustenburg eliphenywa ngamaphoyisa ngemuva kwezinsolo zokukhiphela izakhamuzi isibhamu ngemuva kokuhilizisana ngokuhlinzekwa kwezidingo zomphakathi ngeledlule.
Abanye abahlali bashaqekile bebona indlela uZenzele Xhinela oyikhansela laku-Ward 41 kumasipala waseRustenburg okuthiwa ukhiphe isikhali ngesikhathi kuqubuka ingxabano phakathi kwakhe namalungu esifunda sakhe emhlanganweni obuseMeriting Hall eMeriting Extension 2 ngaphansi kukaMasipala waseRustenburg.
Isimo siqale ngemuva kokuba izakhamuzi zimhlome ngemibuzo ngokuhlinzekwa kwezidingo zomphakathi kanti ngokofakazi akakwazanga ukunikeza izimpendulo ezigculisayo. Izakhamuzi zithi kunephethini yokungalethwa kwezidingo zomphakathi selokhu akhethwa kule wadi.
Ngesikhathi isimo sishuba, leli khansela ebelidinwe ligane unwabu libe selihosha isibhamu lasuka langene emotweni lahamba lisasiphethe ngesandla isibhamu. Ngemuva kwalokho, ezinye izakhamuzi zashisa amathayi zikhombisa intukuthelo yabo ngendlela yokuziphatha kwekhansela.
OLUNYE UDABA:“U-Omotoso ubephila ‘butebhu’ esesitokisini”
Nakuba lokhu sekunesikhathi kwenzeka, isimo sisashubile kule ndawo njengoba umphakathi usadinwe wukuthi leli khansela alikaboshwa.
Ezinye izakhamuzi zithi zisabela impilo yazo, ikhansela zilidinga liboshiwe.
Ngokusho kwamaphoyisa, kuvulwe amacala amaphathathu athinta isigameko sasehholo iMeriting lapho kubizelwe khona amaphoyisa ophiko lwezokuphepha emphakathini. Amaphoyisa kuthiwa aphenya amacala okucekela phansi impahla, udlame lomphakathi, ukusabisa nokukhomba ngesibhamu.
USihlalo we-ActionSA esifundeni saseBojanala West uPaul Chirwa ugxeke ikhansela ngokusabisa ngokudubula izakhamuzi.
“I-REC yaseBojanala West iyasigxeka isenzo esingamukelekile sikaKhansela Zet Xhinela emphakathini owamvotela ehhovisi likamasipala njengekhansela. Ngeke sikubekezelele lolu hlobo lokuziphatha futhi singathanda ukuthi lolu daba lusukunyelwe yi-ANC REC ukuze akhishwe.
“Uyingozi emphakathini futhi kumele athathelwe izinyathelo ezinqala njengoba ejutshwe yi-ANC kuMasipala waseRustenburg,” kusho uChirwa.
Le nhlangano ifunge yagomela ngokuthi izoludlulisela udaba esigungwini esiphezulu sesifundazwe, yona iludlulisela kuSaliva Molapisi onguNgqongqoshe wezokuBusa ngokuBambisana neziNdaba zoMdabu eNorth West.
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
Slandele ku-Facebook no-X (owayekade engu-TwitterEditEditEdit
