I-ActionSA ithathe isinqumo esinzima sokukhansela ukwethulwa kwegatsha okwakuhlelwe ukuthi lizokwethulwa kuWadi 25 eThekwini.
Lokhu kuza ngemuva kokuhlaselwa kwezishoshovu ze-Action SA namuhla ekuseni.
Kuqhume isibhamu amahlandla amaningi ngesikhathi sesigameko, ngenhlanhla isigilamkhuba saphucwa isibhamu.
Ngeshwa kulimale esinye sezishoshovu sathola amanxeba ngesikhathi kuqhubeka isigameko.
OLUNYE UDABA: UNdunankulu waseKZN unxusa i-ANC ne-IFP ukuba babuyisane
Ngenxa yobucayi besigameko kanye nentshisekelo yokuqinisekisa ukuphepha kwamalungu nezishoshovu, okuhlanganisa noMengameli weqembu uHerman Mashaba, kuthathwe isinqumo esinzima sokukhansela ukwethulwa kwegatsha
Lesi sigameko siyisikhumbuzo somlando wokungabekezelelani kwezepolitiki KwaZulu-Natal.
Kuwukwephulwa ngqo kwamalungelo abantu baseNingizimu Afrika okusekela iqembu lezepolitiki ngokukhululeka abazikhethele bona ngaphandle kokwesaba, ukwesatshiswa noma udlame.
Njengoba kubhekwe okhethweni lohulumeni basekhaya lwangonyaka ka-2026, sinxusa wonke amaqembu ezepolitiki kanye namalungu abo ukuze akhuthaze isimo senhlonipho nokubekezelelana, kusho isitatimende se-Action SA.
I-Action SA ithi kuyihlazo ukuthi emzamweni wabo wokuthuthukisa izimpilo zabantu abajwayelekile baseNingizimu Afrika, sebezithole behlaselwa ngokuxhumana nemiphakathi.
I-ActionSA isivule icala lobugebengu esiteshini samaphoyisa eSydenham.
Umsolwa naboshwe nabo kulindeleke ukuba bavele enkantolo ngoLwesibili, ngomhlaka-17 June 2025.
Ngokwesitatimende i-ActionSA ithi izobe ikhona enkantolo ukuyophikisa noma yisiphi isicelo sebheyili.
“Sincoma kakhulu abalandeli nezishoshovu zethu ngobuqhawe babo nangokucabanga okusheshayo, okuyikho okusizile ukuvimbela okunye ukulimala obekusangenzeka.”
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
