Ukhomishana wamaPhoyisa KwaZulu-Natal, uLt General Nhlanhla Mkhwanazi, uncome amalungu omphakathi ngokusiza ukunqanda ekubumbeni itulo lokuziphindiselela eWentworth.
Amaphoyisa athole imininingwane ngeqembu okusolakala ukuthi lihlela ukubulala abasolwa, abasolwa ngokudubula abazalwane ababili ngaphandle kwesonto iSt Mary’s eMerebank ngoMgqibelo.
Bebehambele umngcwabo kamalume wabo kanti imbangela yokubulawa kwalaba abaili ibingakacaci.
UMkhwanazi uthi isigameko sokuziphindiselela bekumele senzeke ngoLwesibili.
OLUNYE UDABA: Akukaboshwa muntu ngokulimala kwamaphoyisa amabili kwesokudubula kwaBester
Ubekhuluma esithangamini sokuxoxisana nabathintekayo nosomabhizinisi baseThekwini ngoLwesibili kusihlwa.
“Ngelungu lomphakathi elizihlalele labheka abasolwa ababethinteka ukuze baziphindiselele, sabe sesiphumelela ukubamba omunye wabo eWentworth. Simtholile nezibhamu ezimbili ezingekho emthethweni nezinhlamvu, izidakamizwa, kanye nemali.
“Ithimba lisamphosa ngemibuzo ukuze lizame ukuthola ukuthi ngabe lizoziphindiselela yini. Impela liyabazi obenze lesi senzo esibi ngempelasonto. Ngakho siyalibonga iqhaza elibanjwa umphakathi ngokusabelana nathi ngolwazi.”
