UJacinta Ngobese-Zuma uxwayise ngokuvalwa kwezwe lonke okungase kwenzeke uma abantu bakwamanye amazwe abangenazo izincwadi ezibagunyaza ukuba seNingizimu Afrika bengasuswa ezweni ekupheleni kukaJune.
Inhlangano iMarch and March banxuse uhulumeni ukuthi amemezele ukufuduka okungekho emthethweni njengesimo esiphuthumayo sikazwelonke.
Le nhlangano iphinde ifune umengameli akhulume nesizwe ngalolu daba ngaphambi kokuphela kwenyanga ezayo.
Uma kungenjalo, uJacinta Ngobese-Zuma, umholi wenhlangano, uthi bakulungele ukuvala izwe lonke.
UNgobese-Zuma ukhulume nabezindaba ngesikhathi senkomfa eMhlanga ngoMsombuluko ebusuku, ekhuluma uthe esinye sezicelo zabo ukuthi abantu bakwamanye amazwe abangenazo izincwadi ezibagunyaza ukuba kuleli bahambe ezweni ngaphambi komhlaka-30 June.
OLUNYE UDABA: IMeya yeTheku ibenomhlanga nabaholi beMarch and March ngolwabokufika
“Sicela uhulumeni ukuthi amemezele isimo esiphuthumayo sokufuduka kwabantu ngokungemthetho okwenzekayo njengamanje ezweni ngaphansi kwesibonakaliso sokuthi lokhu kuwukuhlasela izwe.
“Singathanda futhi ukubiza umthetho ukuthi udlulise imithetho yokugcina umnotho wasemadolobheni ngamabhizinisi amancane aseNingizimu Afrika kuphela, futhi sicele umengameli ukuthi akhulume nesizwe mayelana nezinkinga eziphakanyiswe ngaphambi komhlaka-30 June 2026, njengoba abantu bethu befuna ukuyongena emigwaqweni ngomhlaka-30 June 2026 uma le nkinga ingaxazululwanga kahle.”
UNgobese-Zuma uthi sebeziqalile izingxoxo nezinkampani ezinkulu okubalwa kuzo iCheckers Sixty60, uMr. D kanye neMcDonald’s mayelana nokuqashwa kwabantu abafudukayo abangenazo izincwadi okuba kuleli.
Uthi ubacele ukuthi badalule isibalo sabantu bakwamanye amazwe ababaqashayo kanye nohlobo lwezimvume abanazo.
Lesi sithangami siza ngemuva komhlangano ophuthumayo ePitoli wongqongqoshe beqembu lezobulungiswa, ukuvimbela ubugebengu kanye nokuvikeleka.
Basungule ithimba labasebenzi abasekela ongqongqoshe ukuze basebenzisane nezinhlaka zomthetho ukubhekana nale nkinga. Lizoholwa yiPhini likaNgqongqoshe wezamaPhoyisa uPolly Boshielo kanye nePhini likaNgqongqoshe wezaseKhaya uNjabulo Nzuza.
