Indoda esolwa ngokubulala intombi yayo ivele ngaphambi kweNkantolo yeMantshi yaseChatsworth enyakatho yeTheku namuhla.
Amalungu omndeni kanye nalabo ababasekayo babhikishe ngaphandle kwenkantolo befunela uNtombenhle Nkomo, 30, ubulungiswa.
Okhulumela amaphoyisa ophiko lwe-SAPS eKZN, uNtathu Ndlovu, uthi amalungu omphakathi athole isidumbu sikaNkomo sigqitshwe ethuneni elingashoni eWelbedacht, ngoSuku olandulela olukaKhisimusi, babe sebebikela abomthetho.
OLUNYE UDABA: Uyavela enkantolo osolwa ngokushisa intombi yakhe yaze yashona e-KZN
“Isidumbu sikaNkomo ebesesiqala ukonakala besinamanxeba abonakalayo okuhlukunyezwa kanti isidumbu sakhe sihlonzwe ngokwempumelelo.”
Akucaci kahle ukuthi umufi wabulawa nini kodwa umndeni wabika ngokunyamalala kwakhe ngomhlaka-19 Decembner, kulandela izinsuku eziyishumi agcina ukubonakala.
Kubikwa ukuthi uNkomo ushiye indodakazi yakhe eneminyaka eyishumi ubudala.
