Kushone owesifazane esigamekweni sokudutshulwa eDurban North ngeSonto ebusuku, kwalimala umshayeli wesithuthuthu nengane, lokhu kungokusho kwabosizo lokuqala i-ALS Paramedics.
Abosizo lokuqala bakwa-ALS Paramedics bathe bafike endaweni yesigameko ngemuva nje kwezithuba zabo-17:30 ntambama ku-Blackburn Road eduze noPark Road.
Okhulumela i-ALS Paramedics uGarrith Jamieson uthe ngesikhathi befika, bathole abasebenzi bezokuphepha abaningi kanye namaphoyisa ophiko lwe-SAPS sebevele bekhona endaweni yesigameko, nomgwaqo usuvaliwe.
OLUNYE UDABA: Seziboshiwe izigebengu ezidale ingozi eChatsworth
Abezimo eziphuthumayo bakhonjwe emotweni ebigcwele izimbobo zezinhlamvu, lapho abathole khona owesifazane, okukholakala ukuthi uneminyaka ebalelwa kweko-40 ubudala, enamanxeba amaningi okudutshulwa.
Lo wesifazane uhlonzwe njengoshonile endaweni yesigameko ngemuva kokuba abezimo eziphuthumayo bethole ukuthi akukho abangakwenza ukumsindisa.
I-ALS Paramedics ithe umshayeli wesithuthuthu oshayiswe yimoto walimala, uxilongwe endaweni yesigameko ngaphambi kokuphuthunyiswa esibhedlela kanti ingane yona iphuthunyiswe esibhedlela ukuthola ukwelashwa okwengeziwe.
