Abasolwa abahlanu abebefunelwa icala lokubulala owesilisa nonkosikazi wakhe badutshulwe babulawa ngesikhathi betholana phezulu ngezulu lezandla namaphoyisa endaweni yaseMophela elokishini laseMpumalanga, eHammersdale ngeSonto ebusuku.
Amaphoyisa aqoqe ezobunhloli ngabasolwa abebehamba ngemoto emgaqweni omkhulu waseMophela.
Amaphoyisa afice abasolwa abasayinela ukuba bame. Abasolwa akushaya indiva lokhobakhetha ukuvulela ngenganono bebhekise emaphoyiseni.
OLUNYE UDABA: Kudutshulwe kwabulawa abebefunelwa amacala okubulala eMlazi
Amaphoyisa abe eseziphindiselela, kwabe sekushona abasolwa abahlanu. Emotweni yabasolwa kutholakale izibhamu ezintathu.
Ngokwesitatimende samaphooyisa abasolwa bebefunelwa icala lokubulala owesilisa oneminyaka engu-66 ubudala owadutshulwa wabulawa esemzini wakhe endaweni yaseKwandeni ngoMgqibelo wangesonto eledlule.
Owesilisa wabulawa yintululwane yezinhlamvu ngoJanuary kwathi unkosikazi wakhe yena wadutshulwa wabulawa emzini wabo ngoFebruary kulo nyaka.
Abasolwa bayamaniswa necala lokubulawa kwamaphoyisa amabili.
Uphenyo lusaqhubeka kanti amathuba okuthi abasolwa bayabandakanyeka ebugebengwini obunodlame maningi.
Abasolwa abahlanu abebefunelwa icala lokubulala owesilisa nonkosikazi wakhe badutshulwe babulawa bedubulana namaphoyisa eMophela elokishini laseMpumalanga, eHammersdale ngeSonto ebusuku. pic.twitter.com/M5rpaMsBsM
— Izwilomzansi 98.0 fm (@izwi98fm) May 11, 2025
Kudutshulwe kwabulawa abasolwa abahlanu esigamekweni sokudubulana namaphoyisa eHammersdale ngeSonto ebusuku pic.twitter.com/J8t1nL7dGt
— Izwilomzansi 98.0 fm (@izwi98fm) May 11, 2025
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
