Iziphathimandla ziphenya ngokuholele esigamekweni sokusha komuzi endaweni yaseLadysmith, nokuyisigameko esidlule nemiphefumulo yezelamani ezimbili esezikhulile.
Ilangabi liqubuke emzini okuDelhi Road ngoLwesibili.
Amathimba ezicishamlilo athole izidumbu ezimbili, sowesifazane oneminyaka engu-64 ubudala nesowesilisa oneminyaka engu-61 ubudala ngaphakathi emzini oshe waphela kulandela ukubhula umlilo.
Kuvulwe idokodo emaphoyiseni.
Okhulumela uMnyango Wezokubusa Ngokubambisana Nezindaba Zendabuko KwaZulu-Natal, uSenzelwe Mzila uthi kujutshwe ithimba elikhethekile lezinhlekelele ukuba liyohlinzeka ngosizo.
OLUNYE UDABA: Kushone owesilisa kusha umjondolo ngaseVerulam
“Iminika yakamuva ikhomba ukuthi amalungu omphakathi azamile ukubhula ilangabi ngaphambi kokuba kufike abezimo eziphuthumayo. Abomthetho kanye nabezicishamlilo bagcine bekwazile ukucima umlilo. Njengamanje kuqhutshwa uphenyo ukuthola okuholele esigamekweni.
“UNgqongqoshe uThulasizwe Buthelezi ushayele amalungu omphakathi ihlombe ngesibindi sawo nokuxguma ahlale esimeni esiphuthumayo nokuyinto eveza ubumbano emphakathi. Ngokuhambisana nezinqubo zokunciphisa izingozi, uNgqongqoshe Wezokuphathwa Kwezinhlekelele Wesifundazwe uyalele iSikhungo Sokuphathwa Kwezinhlekelele Sesifundazwe ukuthi sithumele ithimba elikhethekile ukuze liphenye imbangela yomlilo futhi linikeze usizo emindenini ethintekile.
“UNgqongqoshe uphinde wanxusa zonke izakhamuzi zesifundazweni sonke ukuba ziqaphele kakhulu futhi zilandele iziqondiso zokuphepha komlilo, njengoba imililo yesakhiwo isalokhu iyingozi enkulu ezindaweni.”
