UMnyango wezokuThutha KwaZulu-Natal uthi uthole ukushayisana ngemibiko eholele engozini yebhasi neloli eyenzeke ngoLwesibili ekuseni emgwaqeni u-R34 ngaseVryheid enyakatho neKZN.
Kubikwa ukuthi ibhasi ligudluzwe yiloli elithwala izimpahla ezinkulu, nokuyinto eholele ekutheni kushone abantu abangu-10.
I-EFF ikuqinisekisile ukuthi ibhasi belithutha abalandeli abebehambele umhlangano woSuku lweNtsha eKing Zwelithini Stadium, eMlazi, ngoMsombuluko.
OLUNYE UDABA: Owezokuthutha e-KZN ubuyekeze isibalo sabashone engozini yebhasi safinyelele ku-10
UNgqongqoshe wezokuThutha uSiboniso Duma uthe kushone abesifazane abathathu nabesilisa abayisikhombisa kwalimala abagibeli abangu-20 abaphuthunyiswa esibhedlela.
“Bobabili abashayeli bayaphila kanti bona basesibhedlela.
“Lolu daba, wudaba olubucayi ngoba asikahlangani cishe nayo yonke imindeni.”
Kodwa-ke, uDuma uthe abasindile basho izinto ezingafani mayelana nokwenzekile.
Abanye basola ukuthi umshayeli webhasi uzame ukudlula iloli, kanti abanye bathi umshayeli webhasi uzunywe wubuthongo esashayela.
UDuma uthe okwamanje abafuni ukuqagela.
“Futhi ngeke sisho ukuthi yini ebe yimbangela, kuze kube siqinisiqiniseko. Ithimba lihambise ibhasi e-RTI ukuze kuqhutshekwe nophenyo.”
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
