IMeya yeTheku uKhansela Cyril Xaba useqinisekise umphakathi othintekile ngokuvalwa kwesikhashana kwendawo yokulothisa iMobeni Heights ukuthi uMasipala uyaluphuthumisa uhlelo lokubuyisela lesi sikhungo.
IMeya uXaba ivakashele lesi sikhungo namuhla, kuwumhlaka-10 kuJune ukuyozibonela ngokwakhe izinselelo ezikhungethe indawo yokulothisa.
Lesi sikhungo sivalwe emasontweni amathathu edlule ngenxa yokungasebenzi kahle kweziko njengoba bejwayele ukushisisa okuholela ekutheni kube nekhabhoni eliphezulu. Lokhu kwabeka engcupheni impilo yezemvelo emphakathini ozungezile.
Ukulungisa lesi simo, uMasipala usuqale uhlelo lokuthenga izimbawula ezimbili ezizofakwa ekupheleni kuka-August.
OLUNYE UDABA: Kuchazwe kabanzi ngezibalo zakamuva zokuqashwa kwabantu eThekwini koweYouth Month Activities
IMeya isinxuse imiphakathi ethintekayo kulokhu ukuba ibekezele yabe isifunga igomela ukuthi ukulungiswa kwesikhungo izobe ikuqaphe ngeso lokhozi ukuqinisekisa ukuthi lesi sikhungo sibuyela ekusebenzeni ngokugcwele.
“UMasipala ubeke imali engu-R14 million ukulungisa izimbawula nokulungisa yonke indawo,” usho kanje.
IMeya yengeze ngokuthi izinhlelo sezisezingeni eliphezulu ukulungisa indawo yokulothisa izidumbu oThongathi njengoba uMasipala ebeke eqhulwini u-R7 million wokushintsha iziko.
“Silindele ukuthi umsebenzi uphele ekupheleni kwenyanga ezayo oThongathi Crematorium,” kusho iMeya uXaba.
Yize kusalungiswa lezi zikhungo, uMasipala unxusa izakhamuzi ukuba zisebenzise izindawo zokulothisa eziseduze.
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
