Usuku lokugcina lwe-Africa’s Travel Indaba 2026 belugxile ekuqinisekiseni izivumelwano zebhizinisi zokugcina, ukuzindla ngezinto ezibalulekile kanye nokugubha impumelelo yombukiso wezinsuku ezintathu.
Umcimbi waminyaka yonke, obanjelwe e-Durban International Convention Centre, uvulwe ngokusemthethweni nguMengameli uCyril Ramaphosa ngoLwesibili, lwangomhlaka-12 May 2026.
OLUNYE UDABA: Isifikile i-Africa Travel Indaba eThekwini
Kulo mcimbi wombukiso nokuhwebelana bekukhuthazwa kuphinde kuqiniswe ubudlelwano bokusebenzisana nokucobelelana ngolwazi lwezohwebo, utshalomali, izindlela ezintsha zokukhangisa nokudayisa namathuba amahle okukhula embonini yezokuvakasha nokungcebeleka e-Afrika nasemhlabeni jikelele.
Okunye i-Africa’s Travel Indaba 2026 ebifike nakho yizindlela eziningi zokukhangisa nezokuxhumana ezifana no-speed marketing, ukubambisana kwamabhizinisi, izindlela zokukhuthaza osomabhizinisi njengoba kube nemiklomelo ebitholwa kuma-Africa’s Travel Indaba Awards kanye nokuvulwa kwamathuba amasha kwezokuvakasha e-Afrika.
Umcimbi walo nyaka uhehe izivakashi ezilinganiselwe kwezingu-9 800, okuhlanganisa nabakhangisi abangaphezu kuka-1 200 abavela emazweni angu-22 ase-Afrika kanti futhi ubunabathengi abangu-1 000 abamele amazwe angu-44.
I-Africa’a Travel Indaba izoqhubeka nokubanjelwa eThekwini kuze kube ngu-2030.
