UNgqongqoshe wezokuThuthukiswa koMphakathi KwaZulu-Natal, uMbali Shinga, namuhla uzovakashela umndeni wakwaKhumalo othinteke ngokubulawa kwezingane ezintathu ezincane endaweni yaseLulwane (eSithembele) eManguzi, ngaphakathi kwesiFunda saseMkhanyakude.
Ukuhambela kulo mndeni kulandela isigameko esibuhlungu esenzeka ngobusuku bangomhlaka-30 January 2026, esadlula nemiphefumulo kaKwanele Gumede oneminyaka engu-15 ubudala, u-Amanda Khumalo oneminyaka eyisishiyagalolunye ubudala, no-Ayabonga Khumalo oneminyaka eyisikhombisa ubudala.
OLUNYE UDABA: UNgqongqoshe uShinga, ugxeke ukubulawa ngesihluku kwebhungu oLundi
Ngenxa yesigameko sakamuva, uNgqongqoshe Shinga osukwini lwayizolo ngeSonto, uthumele ithimba labasebenzi bezenhlalakahle abavela kwisiFunda saseMkhanyakude ukuyohlinzeka ngokubeseka ngokwengqondo umndeni oshonelwe.
Inhloso yokuvakasha ukudlulisa amazwi enduduzo egameni likaHulumeni wesiFundazwe saKwaZulu-Natal, ukuhlola izidingo zomndeni ezisheshayo, nokuqinisekisa ukuthi kunikezwa ukwesekwa kwengqondo, ukwelulekwa ngokwengqondo kanye nosizo lomphakathi.
