Amadoda amabili okukholakala ukuthi adumela owesifazane ngesibhaxu endaweni yokucima ukoma eMgungundlovu ayavela ngaphambi kwemantshi namuhla.
Ivideo eyaqoshwa ngekhamera ye-CCTV etshengisa isigameko esenzeka ngoSuku lukaKhisimusi isabalale ezinkundleni zokuxhumana.
Kule video kubonakala umsolwa ebhozomela lo wesifazane, emdushela phansi maqede wamkhahlela emshaya ephindelela.
OLUNYE UDABA: Uyavela enkantolo osolwa ngokushisa intombi yakhe yaze yashona e-KZN
Nakuba edonswa ukuba ayeke akwenzayo, kube sekubonakala indoda iqhubeka nokushaya lo wesifazane.
Kwavulwa icala esiteshini samaphoyisa sasePlessislaer.
Okhulumela amaphoyisa eKZN uNtathu Ndlovu uthi la madoda, aneminyaka engu-43 no-46 ubudala, azinikela emaphoyiseni ngeSonto.
“Abasolwa baboshwe, bathweswa icala lokushaya ngenhloso yokulimaza. Kulindeleke ukuthi bavele eNkantolo yeMantshi yasePietermaritzburg.”
