UFloyd Shivambu uyayiphika imibiko yokuthi uselishiyile iqembu loMkhonto weSizwe.
“Angikasuli kuMkhonto weSizwe futhi angisoze ngasula kuMkhonto weSizwe futhi ngiyilungu lawo,” esho etshela izintatheli eGauteng namuhla ngoLwesine.
IMKP yamkhipha esikhundleni sokuba ngunobhala-jikelele lamubeka esikhundleni sokuba yilungu lephalamende ngemuva kohambo lwakhe lwaseMalawi eyovakashela uMfundisi Shepherd Bushiri.
Iqembu loMkhonto weSizwe liziqhelelanisile nesithangami sabezindaba.
OLUNYE UDABA: Isithangami nabezindaba sikaFloyd Shivambu ngoLwesine ‘akusiso eseMK’
Umholi weqembu uJacob Zuma kule mpelasonto uxwayise ngokuthi iMKP ngeke ikubekezelele ukuziphatha kabi kwanoma ngubani, okuhlanganisa namalungu aphezulu.
Esithangamini nabezindaba ebesiseMhulu Luxury Boutique Hotel eMidrand, uShivambu uthe ukukhishwa kwakhe kungenxa yezinsolo zokuthi uhlela ukususa uZuma esikhundleni sobuholi ku-MK.
UShivamu ube esekhomba iNational High Command yeqembu njengomthombo walezi zinsolo.
“Kukhishwe umbiko wezobunhloli ongumgunyathi, okwakuthiwa wawuyingxoxo ephakathi kwami nabanye abantu ezwenikazi lase-Afrika, lapho kuthiwa nakuba ngiqongelele imali yokususa umengameli Zuma, ngiqongelela namandla angaphezu kwawemvelo ukuze ngenze abantu banyamalale,” kusho uShivambu.
UShivambu uchaze lezi zinsolo “njengodoti”, ethe umbiko wesibili owaphinde wasatshalaliswa, uphakamisa ukuthi uhlose ukusebenzisa isikhundla sakhe sasephalamende ukulawula iqembu.
“Ngenxa yalokhu, kwathathwa isinqumo, ebesingakezwakali, sokuthi ngisho nalento yasephalamende akumele yenzeke.
Uqhube wathi kunabantu ngaphakathi eqenjini abafuna axoshwe.
UShivambu udalule izinto ezishaqisayo, ethi uZuma uzungezwe “izikhohlakali zezombusazwe” ezixhaphaza “umusa” kanye “nokungathembeki” kwalowo owayengumengameli ukuze kuqolwe izimali zeqembu i-MK.
Uthe nyanga zonke kuphuma u-R7 million esikhwameni seqembu.
“Ngifunde okuningi njengelungu loMkhonto weSizwe kunalokho engakufunda njengesekela likamengameli we-EFF.”
Uphinde wakuchitha ukuthi kungenzeka ajoyine i-ANC.
“Akekho umuntu ozihloniphayo ozojoyina i-ANC noma i-EFF.”
Yize uShivambu ekubeke kwacaca ukuthi ngeke asungule iqembu elisha lezepolitiki okwamanje, udalule izinhlelo zokuxoxisana nabaholi bendabuko nabezenkolo, kanye nabanye abantu abaqavile baseNingizimu Afrika.
Uqhube wachaza ukuthi isinqumo sokusungula iqembu elisha lezepolitiki sizoncika kwimpendulo azoyithola.
“Iqembu lepolitiki akumele libe yiphrojethi yomuntu oyedwa futhi akumele kube yiphrojekthi yomndeni. Iqembu lezepolitiki akumele libe yiphrojekthi yobuzwe.”
Sithole ezinkundleni zokuxhumana
Landela kwi – WhatsApp Channel yethu Izwi Lomzansi 98.0fm
